Mustafa Özbey

Nustoğ Mıstefa (Mustefa Özbey), cao ke “Ermeni Kaçağı” vanê, nêjdiye na dewe de, dewa Balyayla’de amo dina. Na dewe qeza Tercani ra (suka Erzıngani) giredayiya. Naza amo dina; hama dıma çê u mulxute xo ra bar kerdê şiyê dewa Mığısıye (Yalınca).

Kamiya ke cıra vanê, “Kırmanc u Elevi”, kamiya nustoğ Mıstefa’yiya. Kam ke wayirê na kamiyo; dugela Tırkiya de qırr biyo; zof tenge onta; na dewr de hona hona ki oncenê. Nustoğ Mıstefa’y ki na tenge ra pa u hêsa xo onta. Çı ke nê hukmatê Tırkiya, nê ki taê mılet u qome bini (Tirkiya’de, Tirku) na kamiye nas nêkerda; yinkar kerda. Çıke yitiqatê Elevü, yitiqatê Kırmancu xıravın vinenê. Nia kebiyo, nustoğ na tharve gureta destê xo, na kıtavê xo de nusna. Çıke na tharve ju yê nustoğ bıra Mıstefa’y niya; tharva ma pêroyina. Nustoğ, na tharva qomê mawa ano ra zonê xo ser.

Nustoğ Mıstefa, zerrê qom u homete de, “Erzıngan ra Dot; Hêketa Raye ra Şiyayena ju Mordemê Kırmanc u Elevi”y de, gore na feqırina xo, gore na bêkeşeniya xo şiyo ğeriviye; unciya ki esto xo ver, pay ra mendo. Vılê xo keşi rê çewt nêkerdo. Hama uncia ki gegane, waxt ve waxt teseliya xo, xo ra bırriya; ğeriviye ver damiş nêdo. Nia ke biyo peyser werte de reê dı reê cero ra, amo welate xo; amu zerre mulxutê çê xo.

Niya biyo; rêe dı rêe cero ra amu, welate xode tene waxt vıneto. Dıma, reyna diyağ amo ve cı, reyna şiyo gıno ra u olağa ğeriviye; şiyo sukunê dugelunê Ewrupa. Qeytan omıdê xo nêbırno; têser têser esto xo ver.

Na kıtave nustoğuyo ke nia çarniyo Zonê Ma-Kırmancki, na kıtavê xatıra (Erzıngan ra Dot; Raye ra Şiyayena Hêkata Weşiya Ju Mordemê Kırmanc u Elevi’y) hata nıka dı reê deste çapxane ra vejiyo. Hama ju na kıtav niyo; deste nustoği ra vejiyo: Nainu ra qeyir, “İntizar-Yaşanmış Öyküler” esto; na kıtavki hêketa weşiya isoni ser nuşiyo. Kıtavê bin ki; “Kuşluk Vakti Şiirleri”yo. Name ra ki bêliyo; na kıtav ki kıtavê helbest udeyruno. Na hurdimena kıtavi ki destê Çhapxanê Peri’ya ra, serra 2016’de vejiyê.

Raa sıfteênê serra 2014’i de, na raa dıyene de ki eve kıtavê helbest u deyru “Gönül Dağı Şiirleri” pia serra 2015’ine de uncia deste na çapxane ra vejiye. Dıma nainu ki kıtavê “Öteki Şiirler” serra 2018’de vejiya.

Bıra Mıstefa (Mustafa Özbey) zewejayiyo; wayirê dı çênuno. Serru rau ke welate xo Erzıngan ra duri (1982 ra nat) dugela Yisviçra de suka Bazeli de weşiya xo rameno. Domane xo uza dêwendenê, kar u gureê xo uza no ro.

Çıqaş ke ge ge, werte de (sılxetiye ra amnon) yenu welate xo; dıma, reyna cêreno ra sonu dugela Yisviçra (suka Bazel-Basel); weşiya xo, eve zaw u zeçê xo uza rameno…